بالورب

يعني احنا الشعب الاردني ما بحلالنا الا قطع الشارع بالورب "بشكل قطري " ما بنعرف نمشي دغري بنحب انكون

عوج

خليني اعطيكم مثال انتا زلمة بتسوق بالسيارة ممكن اتكون مبسوط او مكشر و على الاغلب انك بتكون مكشر بدون سبب كمان

طريقك بصويلح او عند الشمالي الجامعة الاردنية ما بتطلع الا هل قرد نط قدامك بالشارع و بالش يمشي كانو الشارع الو لاحالو مفكر حالو سيارة و طريقة قطع الشارع بتكون بالورب زي ما شرحت مسبقا

يا ويلك ازا فكرت تزمرلو, بفقعك بوز زي بوز الاخس كانك طعمتوا و كانك انتا الغلطان و بكمل قطع الشارع بالورب على اقل من مهلو

همه المش فاهمينو انو قطع الشارع بالورب بطول الطريق "ما بعرف شكلهم مش دارسين فيزيا منيح"

مع العلم انو الاشارة او منطقة المشاة الي ممكن يقطع من عندها تبعد اربعة متر

هلا الواحد بفكر طيب يعني هوه البابا و الماما ما علموا كيف يقطع الشارع يمين ,يسار ,يمين ازا ما في سيارات اقطع

الشعب الاردني اختصر ازا ما في سيارات

يعني في سيارات او ما في سيارات اقطع الشارع و الى بشجع الشعب في هاي العملية انو القانون بقلك الاولوية للمشا وين ما كان يعني لو لاقيت واحد حمار بقطع في نص طريق المطار لازم تفقع برك و الي وراك يخبطك و تموت بسه و العامود يوقع و تخبط اربعة ضايعين على جانب طريق المطار و الجيش الي عند وزارة الخارجية ينط عليك مفكرك افتعلت هذه الشغلة عشان عملية ارهابية .

الواحد بصراحة بكون محتار يمرق المشاة الهبايل ويلا يدعسهم و يخلص

كمان مثال مرا مروح انا من الجامعة وصلت دوار صويلح و ماشي على اليمين زي المحترمين و لا مرة وحدة مالقيلكم غير هل القرد ينط قدامي و افقع برك كل اهل صويلح الشيشانية و التعمرية والسلطية و غيرهم يطلعوا علي !!

هلا انتا مفكر انو انا الي مش مفتح !!

لا يا حبيبي انا مصحصح و ما احلاني الحمار الي جنبي على اليسار معوا باص كيا الشبح قرر يصير محترم و يمرق القرد و لما مرقو انا كنت على يمينو و طبعا مش شايف انو الحكي هادا قاعد بصير .

يعني شافين لويني لا سمح الله دعستو كان رحت فيها لانو حمار و صاحب الباص احمر منو " قريب للخضار".

ما عيلنا الخلاصة انو الشعب مفكر حالو سيارات و ما بفهم بالفيزيا .

علاء ابو عريضة

دير بالك من الكوبي رايتس