وين بتروح العالم قاعده ؟

لما تكبر الكل بصير يسافر , ستك بتدفنها بأيديك و سيدك بعد فترة بحكيلك انا مش قادر لانو ستك الله يرحمها ما كانت تخليني انام و انا زعلان فصار لازم اني الحقها , و بالفعل بصير لازم انك تدفن سيدك و ما بضل الك منو غير هالحطة و الطربوش.

الكل بسافر لما نكبر , صاحبك بتخرج و بسافر بقلك عمي بدي اشتغل و اعيش انتا لما تتخرج راح تلحقني كمان فا بنشوفك هناك وحاول انك تستعجل , لازم نسافر!!

و خالك بتجوز و بقلك عمي انا مش زابطة معي لازم أغليها من هون بروح بقدم معاملة الهجرة و بزبط الامور و بحمل حالو هوه و المره و بغليها و بقلك بنشوفك بعد 3 سنيين عشان بتعرف معاملات الهجرة لسه بدها شغل فا انتا بتسأل طيب عند مين انتا رايح !! بقلك شو عند مين ! رايح عند بنت خالتك هيها هناك !!! يعني الكل مسافر.

خالتك بيجي واحد بخطبها و بتجوزو , وكمان بقلك معلش عمي انا بدي اخد بنتكم و اسافر انا مش عارف ادبر حالي هون.

صاحبك بحكي معك بحكيلك يلا يا معلم شد حيلك ارفع المعدل بكره بتخلص و بتيجي عندي انا سافرت بعمل ماجستير !! مين اصلن قلك اني بدي اعمل ماجستير !!

ابن عمتك كمان بجي من الضفة بقلك انا سافرت و هايني اجيت على الاردن بدي اشتغل و اكمل ماجستير , هناك في اليلاد مش زابطة معي !!

الكل بسافر , حتى زيد خلص جامعة من اليرموك و حكا للأهل يلا سلام , انا رايح على عمان هناك , حكولي انو في مصاري و شغل خلي اربد تنفعكم .

طيب ليش يعني الكل بسافر !! هوه الواحد ازا ضل صغير و ما كبر ما حدا بسافر يعني ؟ طيب ليش ما نضل صغار عشان ما حدا يسافر !! انا شخصيا ما بدي اكبر !! انا بدي ارجع صغير عشان ما حدا يسافر !! او اقلكم برجع صغير و بكبر , بس كل ما اتعرف على حدا بسالو : انتا كمان شوي بدك تسافر ؟ اذا قالي نعم بدي اسافر ما بصير صحبه معو , اذا قلي لأ بدي اضل هون بصير صحبه معو !! مش هيك احسن اشي !!

او اقلكم شغلة.................... يلعن يبكم , لما اتخرج اول اشي بدي اعملو اني اسافر و يلا سلام وعيب علي ازا برجع كمان !!

ابو دعاس المسافر.

عالم صوفي

اذكر قبل اربع سنوات عندما كنت طالب مستوى سنة اولى تعرفت على الرفيقة ليلى الزعبي كانت دائما تسالني عن الكتب التي اقرائها و كانت دائما تبتسم لي عندما اكون مرتديا شيئا من الملابس التي طبع عليها صورة لتشي جيفارا,حتى و ما اذا كانت الدنيا برد و كنت انا قد اطبقت الجاكيت على ملابسي كانت تجبرني على ان اخلع الجاكيت حتى يرى الطلاب صورة تشي جيفارا و كانت تقف بجانبي مبتسمة, "رشحت بسببها اكثر من مرة".

كنت دائما اسئل ليلى عن الكتب التي تقراها وكانت تجيب دائما أما بانها قرأت الكتاب او تقول موجود عندي في المكتبة اي بانها ستقرأه في موعد قريب.

استذكر وانه في يوم ما استغربت ليلى كيف انني لم اقراء الكتاب "عالم صوفي" وقلت قيمتي وقالتي روح جيبه واقرا, لملمت نفسي و لملمت فلوسي و انتلقت الى البلد و بسطات الكتب في البلد لأقتني الكتاب , اقتنيت الكتاب وعدت الى المنزل و انا متحمس لقرأته .

الان و بعد اربع سنوات و انا طالب سنه خامسة استذكر ليلى الزعبي كلما مررت على ذكر هذا الكتاب او كلما رايته على رفوف مكتبتي, المفارقة الغريبة انه ومنذ فترة وجيزة كنت اتناقش انا و احدى الرفيقات عن الكتب المقروءة و الغير مقروءة الكتب الممنوعة وغير الممنوعة واتيت على ذكر الكتاب "عالم صوفي" واخبرتها بوجوب قرأته , و انا في مخيلتي استذكر ليلى واشكرها, بعد يومين من هذه الحادثة خبرتني الرفيقة انها بدأت بقراءة "عالم صوفي".

ترى بعد اربع سنين من الان هل ستتذكرني الرفيقة كلما مرت على "عالم صوفي" كما انا اتذكر ليلى ؟!.

مع تحياتي الخالصة .
التوقيع : ابو دعاس الخالص.

هيك يومي كان

اليوم كان بالنسبة الي يوم رائع !!!!

من اسبوع و انا مش جايني نوم , بنام على الاربعة و بصحا زي القرد على الجامعة على الساعة تمنية , بس مبارح المسا الوضع كان احسن رحت عند احمد تخوت علي شوي و اتخوتت عليه , صحيح انو ابو تعمر كان مالو اشي مبارح و كان معصب ......بس طول بالك ابو تعمر ما عاش الي بدو يزعلك.

روحت على البيت و نمت زي البوبو , بدون هز , كان صارلي اسبوع زي ما حكيت مش نايم , على كل حال صحيت مرتاح و كلو تمام .

الموضوع ليش يومي جيد و غير عن الايام كلها , كان هوه انو اول اشي نمت مرتاح, تاني اشي في الجامعة جلست مع تلاته من الرفاق المفضلين عندي الرفيق الاول منهم صحيح كان مش مرتاح كتير و بحكيلي انو عندو شويت مشاكل و انو طفران بس عادي يا رفيق كلنا طفرنين بالاخر و كلنا مش مرتاحين بلعكس خلي هاي الشغلة تعطيك دوافع للافضل يا رفيق,هيك انتا بتضحك على المشاكل مش هيه الي بتضحك عليك.

الرفيقه التانيه منهم اخدني نجيب الصور تاعت التخريج و حكتلي انهم كتير حلوين مع انهم ما عجبوني ! و اجمل ما في الموضوع انهم جد طلعو حلوين لانو لما شافتهم الحجه في البيت نبسطت واعطتني خمس ليرات هاها.

الرفيق التالت لما التقيق في انا و الرفيقة تناقشنا مع بعض في مجموعة من المواضيع, الدين , المجتمع,الوضع الاقتصادي هاها .....الخ , المهم انو انا و الرفيق كنا للمره الاولى بنتفق على مجموعة من النقاط " رائع", و بحب احكيلو اشي واحد " انا لو منك هامشي واكمل في عنادي".

روحت على البيت تغديت مجدره و تمددت امام قناة الجزيرة, طبعا غفيت وانا بحضر بتعرفو الاخبار دايمن معيوده و مكرره, في لحظة من اللحظات وصلتني SMS و كان محتواها من اجمل ما قرات في حياتي لدرجة اني نعجقت و ما عرفت بي شو ارد على هاي ال SMS !!!

صحصحت و شغلت الكمبوتر "على راي ستي" و اكتشفت انو في حد كان اليوم مبسوط مني و من تعليقاتي الي بعتبر انا انها في معظم الاحيان تافهه و ما الها داعي , مع انو هادا الحد ما بعرفو مس خلني احس براحة نفسية كنت محتاجها من زمان.

الخلاصة انو احلى اشي في الدنيا انك تعمل اشي منيح للاشخاص الي من حولك وانتا مش عارف !!!!! وهادا الي صار معي !!.

ابو دعاس الخالص